Вистинско рок училиште
Кога првпат ги видов овие деца, знаев дека музиката е оставена во добри раце. Овие деца знаат што прават. Неколкуте видеа што се ставени на Youtube секојдневно собираат лајкови и имаат милионска посетеност. Меѓу нив секако има и неколку хејтери, ама поголемиот дел се воодушевени.
Иако свират преработки на познати песни, овие деца се несомнено талентирани музичари. Тие на песните им даваат нов, посебен шарм и дури на моменти изгледаат и подобро од оригиналните верзии, а тоа го имаат потврдено и поголемиот број од бендовите чиишто песни се преработени. Преубаво звучат преработките на Tool, Iron Maiden, Dream Theater, Guns’n’ Roses, The Beatles и уште многу други.
Сите тие се ученици на професорот Aaron Okeefe, основач на Loveland Music Academy – приватно музичко училиште, кое започнало со работа во 2007 година и сега има 26 учители и преку 500 ученици. Тоа што го прави ова музичко училиште поразлично од останатите е тоа што покрај изучувањето на основите на музиката, на крај учениците одбираат песна која ја снимаат во познати студија во САД. Во 2009 година Aaron Okeefe носи 24 ученици во Chicago Recording Company, познато студио во кое имаат снимено ѕвезди како Madonna, Mariah Carey, Michael Jackson, Coldplay и уште многу многу други. Таму тие ја снимат преработката на песната Ghost Along the Mississippi од групата Down и успеале да го привлечат нивното внимание. Така песната била ставена на официјалната веб страна на групата, а подоцна почнала да се пушта и на MTV и оттогаш започнува да се зголемува популарноста на ова музичко училиште, но пред се, на музичките таленти кои произлегуваат од него.
Преработката на 46 & 2 од Tool е снимена во познатото студио The Tracking Room Nashville во 2013 година, а видеото од нејзиното снимање било презентирано на 96Rock, Channel 5, Channel 9, MSN и има милионска посетеност на Youtube. Нивната преработка се уште се пушта на американските радио станици.
ПОГЛЕДНЕТЕ ГО ВИДЕОТО КОЕ ИМА 23 МИЛИОНИ ПРЕГЛЕДИ
The school of rock не постои само во филмовите, го има и во реалноста. Треба само некој да повлече иницијатива. Тоа може да биде овде и сега…
За Strumica Online пишува: Марјан Минов
